అంతర్జాతీయ మాతృభాషా దినోత్సవం సందర్భంగా.......తెలుగు విశ్వరూపం

అంతర్జాతీయ మాతృభాషా దినోత్సవం సందర్భంగా.......

తెలుగు విశ్వరూపం 

***************

అచ్చులతో అల్లికలు నేర్చి 

హల్లులతో మాలికలు కూర్చింది 

గుణింతాలతో సుగుణాలు చెక్కి 

ద్విత్వాలతో శిల్పాలు మలిచింది 

సంధులతో సంబంధాలు పేర్చి 

సమాసాలతో విశేషాలు చెప్పింది 

సంయుక్తాలతో యుక్తులు పన్ని 

అలంకారాలతో అందలమెక్కింది 

విభక్తులతో ఆకర్షణ చేసి 

ప్రత్యయాలతో ప్రతిమ చేసింది 

యతులతో గతులు మార్చి 

ప్రాసలతో ప్రతిభ చూపింది 

ఛందస్సులతో ఉషస్సు నింపి 

పద్యాలతో కదం తొక్కింది 

అవధానాలతో వేదికలెక్కి 

ఆశువుగా ధారణ చేసింది 

నుడికారాలతో నుదుటి బొట్టై 

తలకట్టులతో అందాలు చిందింది 

సామెతలతో వాసికెక్కి 

జాతీయాలతో రాశి పెంచింది 

ఏమని వర్ణింతు 

నా తెలుగు భాష ప్రతిభాపాటవం 

సుమధుర సుందర అక్షర విశ్వరూపం !!

పి. లక్ష్మణ్ రావ్

అసిస్టెంట్ రిజిష్ట్రార్ (సహకార శాఖ) విజయనగరం 

9441215989